-
18 Eka, 2024
Sagarrak elkarteak San Fausto plazako zuhaitzen babesa aldarrikatzen du.
Sagarrak Talde Ekologistak San Fausto plaza birmoldatzeko egiten ari diren lanen ondorioz zuhaitzen etorkizunaz, eta bereziki argazkian ikus daitezkeen hiru haritzena, bere kezka adierazi nahi du.
Onartutako birmoldaketa-obraren proiektuaren arabera, plazako zuhaitz guztiak mantenduko dira.
Basauriko Udalak 2022an onartutako hiri-zuhaitzak babesteko ordenantzak honako hau ezartzen du:
"Landaredia obrak hasi aurretik babestu behar da, eta, bereziki, edozein makina sartu aurretik. Zuzeneko kalteak (kolpeak, zauriak) eta zeharkakoak (lurzorua trinkotzea) saihesteko, makineriaren sarbidea mugatuko duen itxitura bat jarriko da obrei ekin aurretik. Hori ezinezkoa bada, obrei ekin aurretik, makinak igarotzeko bide bat seinaleztatuko da, zuhaitz bakoitzaren aurrean seinaleztapen-balizak jarriz, adaburuan eraginik izan ez dadin ".
Artikulu berak ezartzen duenez, zuhaitz-multzoka babestu ezin bada, ale bakoitza banaka babestu beharko da, enborraren inguruan gutxienez 3 metroko altuerako itxitura eginez. "material bigungarriz babestu beharko da:
- Hesiarekin kontaktuan dagoen enborraren zatia.
- Loturen eta azalaren arteko ukipen-eremuak.
- Sustraiaren lepoaldea, behar izanez gero.
Makineriaren pasaguneetan dauden adar baxuenak (3,5 m-tik beherakoak) behar bezala seinaleztatuko dira eta bigungarri txiki batekin babestuko dira ".
Lanak hasi eta hilabetera, zuhaitz guztiak erabat babesik gabe daudela dakusagu eta, zehazki, aipatutako hiru haritzak makinaz eta obrako hondakinez inguratuta daude. Gainera, ordenantzak dioen bezala, beheko adarrak ez babesteaz gain, makinen lana errazteko, moztu ere egin dituztela ikus dezakegu.
Arau horren arabera, "landaredia babesteko aginduak bete gabe obrak egitea" arau-hauste oso larria da.
Beste behin ere adierazi nahi dugu udal honek erabateko axolagabekeria eta tratu txarra ematen diela gure udalerriko zuhaitzei indarrean dagoen araudia betearazteko neurriak hartu ez dituelako. Badirudi araudi hori irudi-garbiketa berdea egiteko modu bat baino ez dela gure udalerriko hiri-zuhaiztiak eta berdeguneak babesteko beharrezko neurri bat izan beharrean. Hori den hori funtsezkoa da klima-aldaketaren eta biodibertsitatearen galeraren aurkako borrokan, larrialdi klimatikoaren une hauetan.
Basauri, 2024ko ekainaren 18a