-
11 Eka, 2024
Sagarrak ECHO proiektuaren enbaxadorea izango da
2030erako lurzoru osasungarriak sustatzen dituen "A Soil Deal for Europe" europar misioaren barruan Sagarrak Ekologista Taldea ECHO proiektuaren enbaxadorea izango da.
Ibercivis Fundazioak koordinatuko du herritarren zientzia-proiektu interesgarri hau. Arduradun nagusi honek proiektuaren enbaxadore izatera gonbidatu gaitu.
23/24 ikasturtean arnasten dugun airea aztertu ondoren, eta bertan behera utzi gabe, zapaltzen dugun lurzoruaren eta jaten ematen digun lurzoruaren kalitatea aztertuko dugu. Lurzoruen degradazioa denon ahotan dago eta, proiektu honen bidez, lurzoruaren egoera ezagutu nahi dugu eta dituen inpaktuak zabaldu. Errealitate horretatik abiatuta, proiektuak gure lurzoruak errespetatuko dituzten eta lurzorua degradatzen edo kontserbatzen zein neurritan laguntzen dugun pentsarazten diguten ekintzak sustatu nahi ditu.
Gaur gure eskualdeko 2030 Agenda koordinatzen duen Ingurugelak programatutako saioan parte hartu dugu. 24/25 ikasturtean gure lurzorua aztertzeko garatuko den ECHO proiektua aurkeztu diegu eta horretan parte hartzera animatu egin ditugu gure inguruko ikastetxeak.
Deialdia ez da ikastetxeentzat bakarrik, ezta gure eskualdearentzat bakarrik ere; beraz, parte hartu nahi baduzue, jar zaitezte gurekin harremanetan eta, informazio gehiago izan ahala, zuekin partekatuko dugu.
Bidaia honetan Landare Fisiologia saileko UPV/EHUko lagunek bat egingo dute gurekin. Unibertsitateak ikastetxeekin eta, oro har, herritarrekin dituen trukeak ezinbestekoak dira ezagutza transmititzeko, bai laborategietan lortutakoak, bai belaunaldiz belaunaldi oinordetzan jasotako guztiok praktikatzen duguna. Horrela eztabaida-fluxua sortu ahal izango dugu eta, ondorioz, praktika hobeak partekatu ahal izango ditugu.
Osasuntsu bizi, arnasa hartu eta ondo jan!
Web Mision EU A soil deal for Europe